Ёш мерганларни саралаб берган қизиқарли беллашув 21.10.2022 09:26Қорақалпоғистон Республикаси “Қўриқлаш” бошқармаси ходимлари ташаббуси билан куни кеча Нукус шаҳрида ёшларимизнинг спортга бўлган қизиқишларини янада ошириш, улар орасида соғлом рақобат ва мусобақа муҳитини яратиш, ёш авлодни буюк аждодларимиз каби мард ва жасур, жисмонан бақувват ва ватанпарвар этиб тарбиялаш мақсадида спортнинг камондан отиш тури бўйича ёшлар ўртасида “Қўриқлаш” бошқармаси бошлиғи кубоги учун мусобақа ўтказилди.
Беллашувда шаҳар ва туманлардан жами 100 нафардан ортиқ ёш спортчилар иштирок этиб, ўзаро беллашувлар олиб борди. Спортчилар асосан “Микс” ва “Олимпик раунд” йўналишларида беллашиб, 5 маротаба ёйларни 30 метр узоқликдаги нишонларга йўналтириб “очко” жамғариб бордилар.
Ҳар бир иштирокчи яккалик ўйинларида иштирок этиб нишонни аниқ,тўғри ҳамда тез нишонга олишга ҳаракат қилишди. Умидли спортчиларнинг кўпчилиги мактаблар қошида ташкил этилган камондан отиш секцияларининг ўқувчилари ҳисобланиб бўлиб ўтган мусобақа улар учун маҳоратини намойиш этиш катта имконият тақдим этди.
Ўйинлар ҳаваскор ва профессионал спортчилар ўртасида алоҳида ташкил этилди.Ҳар ким ўз мерганлик қобилиятини синовдан ўтказар экан ушбу нуфузли мусобақада ғолиблик учун астойдил кураш олиб бордилар.
Қизиқарли беллашув якунларида энг кўп балл жамғарган иштирокчилар номи аниқланди. 100 нафар ёш мерганлар орасидан 3 нафар атлетлар номи аниқланиб уларга эсдалик совғалари топширилди.
